تشابه الحلم مع الوسواس

 ظهور أعراض واختفاء أعراض، مع حركية “النقلة”، فى العلاج ، هو العلاج النفسى عبارة عن إيه، إن إحنا بنعمل تحريك لوقفة، وبنعمل تقريب للى جوه من اللى بره، وبالعكس، مش عشان نفبرك أى تصالح والسلام، لأه، عشان يتحركوا مع بعض فى اتجاه صحيح، أظن إن ده شئ جيد.

 فاضل بقى حسابات التدخل: هل ندى دوا ضد الوساوس أو مهدئات عظيمة (نيورولبتات) علشان نهدى اللى جوه شوية؟ هل نسيبها من غير دوا مادام العلاقة بتنمو والبنت منتظمة فى الحضور وأهلها أصبحوا معقولين ومتعاونين؟ ده كله يتحسب خطوة بخطوة.

لازم تحدد موقفك إنت أول بأول من الحكايات دى وأهم حاجة هى مسألة ضبط الجرعة، ما احنا قلنا ميت مرّة إن العلاج النفسى وقت وتوقيت وجرعة، مش كده ولا إيه؟ كل ده تحدده مع نفسك ومعاها ومعانا إذا حبيت، وماتنساش علامات ومحكات ومقاييس الحياة الواقعية طول الوقت، يعنى تخلى بالك من دراستها ونومها وعلاقاتها مع اللى حواليها غير أمها، وانت قلت لنا حاجات كويسة عن تطور علاقتها بأمها نتيجة لتغيرها، وتاخد بالك إذا كان ظهور الوساوس دى بيعطلها، بندى هنا ممكن نيورولبتات^([1]) بجرعة متوسطة يمكن أهم من مضادات الوساوس، يعنى مثلا ستيلازين أو حاجة مكافئة، وإحنا نخلينا فاكرين حكاية أخوها واللى عنده، ونعمل كده وإحنا بنكمل فى المناطق اللى انت شفت فيها كبت فظيع دى.

 الله أعلم الحكاية هاتمشى إزاى، إنت وشطارتك، المسألة عايزة وقت، وانت بقالك يادوب تلاث شهور، ومسألة الإفراج عن المشاعر الجنسية لأول مرة فى السن دى مش سهلة فى مجتمعنا خصوصا، يعنى ما نفرحشى قوى إنها سمحت للطبيعه البشريه اللى جواها إنها تطلع إلا فى حدود سقف المجتمع اللى هى عايشة فيه، ويمكن زيادة سنّه صغيرة وبرضه خلّى بالك من تشابه الحلم مع الوسواس، وإن الإتنين بيشاورو على التعرّى، وعلى الجنس فى نفس الوقت،،،،،،

https://rakhawy.net/بعض-معالم-العلاج-النفسى-من-خلال-الإشرا/

[1] – Neuroleptics مضادات الذهان